Аҳолини ижтимоий муҳофаза қилиш – энг муҳим вазифа

2022-07-15

Ташриф давомида вазир Бухоро тумани “Сўфикоргар” маҳалла фуқаролар йиғини ҳудудидаги Ўзбекистон – Туркия қўшма корхонаси фаолияти билан танишди. 

Шунингдек, ойнаванд замонавий иссиқхоналар қуриш, помидор маҳсулотлари етиштиришга ихтисослашган “Варнет” корхонасида иссиқхоначиликни ривожлантириш бўйича амалга оширилаётган ишлар, тажрибалар таҳлил қилди. Корхонада ишчи-ходимлар учун яратилган шароитлар бирма-бир таҳлил этилди.  

Мазкур корхона “Бухоро агро” эркин иқтисодий зонаси ҳудудида жойлашган. Гидропоника усулида маҳсулот етиштирилаётган иссиқхона маҳсулотлари Россия ва Қозоғистон давлатларига экспорт қилинади. Корхонада 400 га яқин ишчи меҳнат қилади.

Ҳудуднинг 30 гектарида иссиқхона қурилган бўлиб, 13 гектарида ҳосил етиштирилмоқда. Қолган қисмида қурилиш ишлари олиб борилмоқда.  

Нозим Ҳусанов иссиқхона агрономи мутахассислиги бўйича ишсиз фуқароларни ўқитиш масалаларини ҳам муҳокама қилди.  

Вилоятда аҳоли бандлиги ва даромадларини оширишга ҳар томонлама кўмаклашиш, ишсизлар, айниқса, ёшлар ва хотин-қизлар, меҳнат бозорига илк бор кириб келаётган битирувчилар бандлигини таъминлаш бўйича янги таъсирчан механизмларни жорий этиш, эҳтиёжманд аҳолини меҳнат фаолиятига жалб қилишда қулай шароитлар яратиш, шунингдек, янги иш ўринларини ташкил этган тадбиркорлик субъектлари фаолиятини янада рағбатлантириш мақсадида муайян ишлар амалга оширилмоқда. 

2022 йилнинг январь-май ойларида жами 293 минг 113 нафар фуқаронинг бандлиги таъминланди.

Мутасаддиларнинг таъкидлашича, вилоятда ишсизлик даражасини камайтириш, аҳоли бандлигига кўмаклашиш ва уларни ижтимоий ҳимояга олиш мақсадида 2022 йилнинг 1 июнь ҳолатида меҳнат органлари томонидан 49 минг нафардан ортиқ фуқароларга турли хизматлар кўрсатилган. 

Жумладан, 13 минг 569 нафар ишсиз фуқаролар доимий ишга жойлаштирилган. 3 минг 258 минг нафар фуқаролар меҳнат бозорида талаб юқори бўлган касбларга бепул ўқитилган. 1 минг 312 нафар ишсизларга ишсизлик нафақаси тайинланган.

2 минг 681 нафар ишсиз фуқароларнинг хонадонига томорқа субсидияси йўналишида хизматлар кўрсатилган. Тадбиркорлик қилиш истагини билдирган фуқаролар рўйхати шакллантирилиб, касбга ўргатиш учун бандликка кўмаклашиш давлат жамғармаси ҳисобидан 97 миллион сўм субсидия ажратилган.  

Ўзбекистон Республикаси Бандлик ва меҳнат муносабатлари вазири ижтимоий меҳнат масалалари бўйича уч томонлама комиссия томонидан “Муносиб меҳнат шароитларини яратиш – иш берувчиларнинг бурчи” мавзусида ўтказилган амалий семинарда ҳам қатнашди.